ضلعی انتظامیہ زیارت اور لیویز فورس کی کارروائی، دہشت گردی کا ایک بڑا منصوبہ ناکام ، 5 دہشتگرد گرفتار ۔

کوئٹہ : ضلعی انتظامیہ زیارت اور لیویز فورس نے بروقت کارروائی کرتے ہوئے دہشت گردی کا ایک بڑا منصوبہ ناکام بنا دیا۔کارروائی کے دوران پانچ دہشت گردوں کو گرفتار کر لیا گیا جن کا تعلق قندہار، افغانستان سے بتایا جاتا ہے ۔دہشت گردوں کو سپیرا رغہ لیویز چیک پوسٹ سے حراست میں لیا گیا ڈپٹی کمشنر زیارت کے مطابق ملزمان کے قبضے سے بھاری مقدار میں اسلحہ و گولہ بارود اور مواصلاتی آلات برآمد ہوئے جن میں 11 ہینڈ گرینیڈ، 3 ایس ایم جیز، 2 ایم فور رائفلز (پارٹس کی صورت میں)، ایک گرینیڈ لانچر، 9 ایم فور میگزینز، 14 ایس ایم جی میگزینز، 420 ایس ایم جی رانڈز، 230 ایم فور رانڈز، ایک کلو بارودی مواد، 6 وائرلیس سیٹس، 4 موبائل فونز، 2 آر بي جیز، ایک ڈگر، 13 ایمونیشن بیگرن، 16 پاور سیلز، 15 ایس ایم جی گرینیڈ، ایک سوزوکی کیری وین، ایک موٹر سائیکل اور کالعدم تنظیم ٹی ٹی پی کا لٹریچر شامل ہےوزیر اعلی بلوچستان میر سرفراز بگٹی نے کامیاب کارروائی پر ڈپٹی کمشنر زیارت، لیویز فورس اور ضلعی انتظامیہ کو کارکردگی کو سراہتے ہوئے کہا کہ بلوچستان کے عوام کے تحفظ کے لیے سیکیورٹی اداروں کی قربانیاں اور بروقت اقدامات قابل فخر ہیں ۔وزیر اعلی نے کہا کہ دہشت گردی کے خلاف جنگ میں ایسے آپریشنز امن دشمن عناصر کے عزائم کو ناکام بنانے کا ذریعہ ہیں انہوں نے کہا کہ حکومت بلوچستان امن و استحکام کے قیام کے لیے تمام وسائل بروئے کار لاتی رہے گی اور قانون نافذ کرنے والے اداروں کی پوری طاقت سے پشت پر کھڑی ہے ۔