اوتھل: نیشنل بینک میں مسلح ڈکیتی، لاکھوں روپے لوٹ لیے گئے ۔ فورسز کی وردیوں میں ملبوس ڈاکو لاکھوں روپے لوٹ کر فرار ہو گئے۔ ڈاکوؤں کے تعاقب میں جانے والے ایس ایچ او اوتھل یار محمد کمانڈو فائرنگ کے تبادلے میں شدید زخمی ہوگئے۔ تفصیلات کے مطابق جمعہ کے روز اوتھل میں نیشنل بینک پر دن دہاڑے مسلح ڈاکوؤں نے دھاوا بول دیا۔ نقاب پوش ملزمان اسلحے کے زور پر بینک میں داخل ہوئے ڈاکوؤں نے مزاحمت کرنے والے 2 سیکورٹی اہلکاروں محمد نواز جاموٹ اور محمد داؤد کو کلاشنکوف کے بٹ مار کر شدید زخمی کردیا اور عملے کو یرغمال بنا کر کیش تھیلوں میں ڈال کر فرار ہوگئے۔ ۔ واردات کی اطلاع ملتے ہی لسبیلہ پولیس کے بہادر ایس ایچ او یار محمد کمانڈو نے ڈاکوؤں کا تعاقب کیا، تاہم ابو ہوٹل کے مقام پر ڈاکوؤں نے ان پر فائرنگ کر دی، جس کے نتیجے میں ایس ایچ او اوتھل یار محمد کمانڈو شدید زخمی ہوگئے۔ڈاکو اپنی گاڑی کو آگ لگا کر فائرنگ کرتے ہوئے اسلحے کو جنگل میں پھینک کر فرار ہوگئے ایس ایچ او اوتھل یار محمد کمانڈو کو فوری طور پر تشویشناک حالت میں ڈسٹرکٹ ہیڈکوارٹر ہسپتال اوتھل منتقل کیا گیا، جہاں ابتدائی طبی امداد کے بعد کراچی ریفر کر دیا گیا۔ بینک ڈکیتی کی اطلاع ملتے ہی ایس ایس پی لسبیلہ کیپٹن نوید عالم نے علاقے کی ناکہ بندی کرکے ڈاکوؤں کی تلاش شروع کر دی ہے ڈاکوؤں کے تلاش کی کارروائی کی نگرانی ایس ایس پی لسبیلہ خود کر رہے ہیں جبکہ واقعے کی مزید تحقیقات جاری ہیں ۔
Leave a Reply